கோவிட்-19 கொரோனா வைரஸ் பரவாமலிருக்க என்ன செய்ய வேண்டும்?

கோவிட்-19 கொரோனா வைரஸ் பரவாமலிருக்க என்ன செய்ய வேண்டும் ?

கோவிட்-19 எனப்படும் கொரோனா வைரஸ் நோய்க்கு சீனாவிலும் பல்வேறு நாடுகளிலும் ஆயிரக்கணக்கானோர் இறந்துள்ளனர். மேலும் பல ஆயிரக்கணக்கானோரை இந்த நோய் பாதித்துள்ளது. இந்த நோயைக் கட்டுப்படுத்த நாம் என்ன செய்ய வேண்டும் என்பது பற்றி விளக்குகிறது இந்த செய்தி.

கோவிட்-19 நாவல் கொரோனா வைரஸ் என்பது பெரிய குடும்பமான கொரோனா வைரஸ்கள் (CoV) ஒரு புதிய ரகமாகும். இது சளி முதல் மிகவும் ஆபத்தான பல சுவாசக் கோளாறுகளை உருவாக்கி விடும். இது வரை, மனிதர்களிடம் இந்த நோய்க்கான அறிகுறிகள் காணப்படவில்லை. அவை விலங்குகளிடமிருந்து மனிதர்களுக்குப் பரவும் கிருமியாக உள்ளது. இனி, இந்த நோய் பரவாமல் இருக்க என்ன செய்ய வேண்டும், என்ன செய்யக்கூடாது என்பதைக் காண்போம்.

என்ன செய்ய வேண்டும் ?

உங்கள் உடலையும் சுற்றுப்புறத்தையும் மிகவும் சுத்தமாக வைத்துக் கொள்ள வேண்டும்.

அடிக்கடி சோப்பு போட்டு கை கழுவ வேண்டும்.

இருமல் அல்லது தும்மும்போது வாயை மூடிக் கொள்ள வேண்டும். இதனால், உங்களிடம் இருந்து மற்றும் பலருக்கு இந்த நோய் பரவாமல் தடுக்கலாம்.

இருமல் அல்லது மூக்கு ஒழுகுவது போன்ற சுவாச அறிகுறிகள் இருந்தால் முகமூடியை அணிந்து கொள்ளுங்கள்.

ஏதாவது சந்தேகம் இருந்தாலோ, உடல் நலம் இல்லாதது போல உணர்ந்தாலோ, உடனடியாக மருத்துவ உதவியை நாட வேண்டும்.

சீனாவில் இருந்து இந்தியாவிற்க்கு வந்திருந்தால், உடனே அரசு மருத்துவமனையை அணுகி அவர்களின் ஆலோசனைகளைப் பெற்றுக் கொள்ள வேண்டும்.

என்ன செய்யக் கூடாது ?

நோய்வாய்ப்பட்டது போல் உணர்ந்தால், எங்கும் பயணம் செய்ய வேண்டாம். பயண திட்டங்களைக் கைவிட்டு விடுங்கள்.

சீனாவிற்க்கு பயணம் செய்வதைத் தவிருங்கள்.

உடல்நிலை சரியில்லாத நண்பர்களுடனோ, கூட்டத்திலோ இருப்பதைத் தவிர்க்கவும். நோய்க்கான அறிகுறிகள் இருந்தால் உடனே மருத்துவரிடம் ஆலோசனை பெறவும்.

விலங்குகளை நேரடியாகத் தொடுவதோ கொஞ்சுவதோ செய்ய வேண்டாம். மேலும் சமைத்த இறைச்சிகளை உண்பதைத் தவிர்க்கவும்.

விலங்கு மற்றும் பறவைப் பண்ணைகள், நேரடி விலங்கு சந்தைகள் அல்லது விலங்குகள் படுகொலை செய்யப்படும் இடங்களுக்கு பயணம் செய்வதைத் தவிர்க்கவும்

28ஆ 29ஆ? லீப் இயர் ஏன் வருகிறது?

28ஆ 29ஆ? லீப் இயர் ஏன் வருகிறது?

நடக்கும் வருடத்தை நான்கால் வகுத்து மீதி பூஜ்யம் வந்தால் லீப் இயர் என்று நமக்கு சொல்லிக் கொடுத்தார்கள். அதாவது நான்கு வருடத்திற்க்கு ஒரு முறை மட்டும் பிப்ரவரி மாதத்திற்க்கு 29 நாட்கள். மற்ற ஆண்டுகளில் 28 நாட்கள். ஏன் இந்த கணக்கிடும் முறை வந்தது ?

நாம் இன்னும் இன்றும் பயன்படுத்தி வரும் நாட்காட்டி முறையானது பழங்கால கிரேக்க (கத்தோலிக்க கிருகோரியன்) நாட்காட்டி முறையாகும். இதன் முறைப்படி தான் நான்கு ஆண்டுகளுக்கு ஒரு முறை பிப்ரவரி மாதம் 29 நாட்கள் வருகிறது.

பூமி தன்னைத் தானே சுற்றி வருகிறது. மேலும் சுரியனையும் சுற்றி வருகிறது. தன்னைத் தானே சுற்றிக் கொள்ள எடுத்துக் கொள்ளும் நேரம் 24 மணி நேரம் ஆகும். இந்த ஒரு நாள் நேரத்தை அளவீட்டுக் கருவியாக வைத்து, பூமி சூரியனைச் சுற்றி வரும் நேரத்தை அளவிட்டால், 365.25 நாட்களாகிறது. அதாவது, பூமி தன்னைத் தானே 365.25 முறை சுற்றிக் கொண்டிருக்கும் போது, சூரியனைச் சுற்றி வரும் சுற்றில் ஒரு சுற்று நிறைவடைகிறது.

இதனால், நாம் பூமி தன்னைத் தானே சுற்றும் நேரத்தை அளவு கோலாகக் கொண்டு சூரியனைச் சுற்றும் நேரத்தைக் கணக்கிடும் போது, ஒவ்வொரு வருடமும் .25 நாட்கள் குறைத்து கணக்கிடுகிறோம். இந்த .25 நாட்கள் நான்கு வருடங்களுக்கு ஒரு முறை வரும் போது ஒரு நாளாக கருதி, நான்கு ஆண்டுகளுக்கு ஒரு முறை இதை ஈடு கட்ட ஒரு நாளாக கணக்கிட்டுக் கொள்கிறோம். பிப்ரவரியில் ஏற்கனவே குறைவான நாட்களாக 28 நாட்களே உள்ள நிலையில், இந்த பிப்ரவரியில் இதை 29 ஆவது நாளாக 4 ஆண்டுகளுக்கு ஒரு முறை இணைத்து கணக்கிடப்படுகிறது.

பூமி தன்னைத் தானே சுற்றி வரும் நேரத்தின் கால அளவு வேறு. பூமி சூரியனைச் சுற்றி வரும் கால அளவு வேறு. பூமி தன்னைத் தானே சுற்றும் கால அளவு ஒரு நாள், அதாவது 24 மணி நேரம். இந்த அளவை வைத்து நாம் பூமி சூரியனைச் சுற்றி வரும் நேரத்தை அளவிடுவதால் கணக்கு இவ்வாறு வருகிறது.

நம் பாரத நாட்டின் பண்டைய கால அளவும், கணக்கீட்டு முறையும் இது போன்று அல்ல. பூமி தன்னைத் தானே சுற்றி வரும் நாள் கணக்கையும், சந்திரன் பூமியைச் சுற்றி வரும் கால அளவையும் அளவீடாகக் கொண்டு மாதங்கள் கணக்கிடப் படுவதால், இந்த சரிக்கட்டும் கணக்கு தேவையில்லாத ஒன்றாகிறது.

கோவிட்-19 கொரோனா வைரஸால் ஏற்படும் நோய்க்கு பெயர் அறிவிப்பு

கோவிட்-19 கொரோனா வைரஸால் ஏற்படும் நோய்க்கு பெயர் அறிவிப்பு

சீனாவில் உருவாகி, தற்போது உலகம் எங்கும் பரவி அச்சுறுத்தி வரும் கொரோனா வைரஸால் ஆயிரக்கணக்கானோர் பாதிக்கப்பட்டுள்ளனர். இந்த கொரோனா வைரஸால் ஏற்படும் நோய்க்கு கோவிட்-19 எனப் பெயரிடப்பட்டுள்ளதாக உலக சுகாதார நிறுவனம் அறிவித்துள்ளது.

கொரோனா வைரஸால் சீனாவின் ஊகான் நகரம் முற்றிலும் முடக்கப்பட்டு தனிமைப்படுத்தப்பட்டுள்ளது. இது மேலும் இந்த கிருமி பரவாமல் இருப்பதற்காக நடவடிக்கை எடுக்கப்பட்டுள்ளது. இதனால் அங்கு அத்தியாவசியப் பொருட்களுக்கு மிகவும் தட்டுப்பாடு ஏற்பட்டுள்ளது. நோய் பரவாமலிருக்க ரோபோக்கள் உதவியும் அத்தியாவசிய பொருட்களை அனுப்பி வருகிறது சீனா.

கொரோனா பீதி தற்போது சிங்கப்பூரையும் விட்டுவைக்க வில்லை. ஒரு குறிப்பிட்ட வங்கி ஊழியருக்கு கொரோனா வைரஸ் தாக்கியிருப்பதால் முன்னூறுக்கும் மேற்பட்ட தனது ஊழியர்களை அந்த வங்கி வீட்டுக்கு அனுப்பி வைத்தது.

தற்போதைய நிலவரப்படி 20 நாடுகளுக்கும் மேல் இந்த வைரஸ் பரவியுள்ளது. சீனாவில் மட்டும் 44 ஆயிரம் பேருக்கு மேல் பாதிக்கப்பட்டுள்ளனர். இந்த நிலையில் தான் கொரோனா வைரஸ் நோய்க்கு அதிகாரப்பூர்வ பெயர் வைத்திட வேண்டும் என்ற கோரிக்கை எழுந்தது. கொரோனா வைரஸ் நோய் ஆகிய வார்த்தைகளின் சொற்களை இணைத்து கோவிட்-19 என்று அதிகாரப்பூர்வமாக இந்த பெயரை உலக சுகாதார நிறுவனம் அறிவித்துள்ளது. 19 என்பது ஆண்டு 2019 ஐக் குறிப்பதாக உள்ளது.

இந்த வைரஸ் மேலும் பரவாமலும், இதற்கு உரிய மருந்தை சீக்கிரம் கண்டுபிடிக்க வேண்டும் என்பது தான் அனைத்து மக்களின் வேண்டுகோளாக இருக்கிறது.

௧௨௩௪௫௬௭௮௯ இதெல்லாம் என்ன?

௧௨௩௪௫௬௭௮௯ இதெல்லாம் என்ன?

நம் தமிழ் எண்கள் தான்.

எண்ணும் எழுத்தும் கண் எனத் தகும்

என்பார் ஔவையார்.

குறள் 392:

எண்ணென்ப ஏனை எழுத்தென்ப இவ்விரண்டும் 

கண்ணென்ப வாழும் உயிர்க்கு

என்பது தெய்வப்புலவர் திருவள்ளுவர் பெருமான் வாக்கு. அத்தகைய கண்கள் போன்ற நம்முடைய தமிழ் எண்களை நாம் இன்று பயன்படுத்துகிறோமா ? முதலில் அந்த எண் வடிவங்களைத் தெரிந்து வைத்திருக்கிறோமா ?  உலகின் மூத்த மொழி என்ற பெருமை உடைய நம் தமிழ் மொழியின் எண்களை நாமே பயன்படுத்தாவிட்டால், அமெரிக்கர்களும் உருஷ்யர்களுமா பயன்படுத்துவார்கள் ?  இந்த கேள்வியை நாம் ஒவ்வொருவரும் நமக்கே கேட்டுக் கொண்டு, அதற்கான நம் கடமைகளை உணர்ந்து செய்ய வேண்டும். ஆகவே, தமிழ் எண்களின் உருவங்களை அறிந்து கொண்டு, அதை எளிதாக மனனம் செய்வதற்குரிய வழிகளைப் பின்பற்றி பயன்படுத்த ஆரம்பித்துவிட்டால், நம் எண்களுக்கு உயிர் வந்து விடும். இந்த முயற்சியை நம்மிலிருந்தே தொடங்குவோம். அதற்கான கருவி தான் இந்த காணொளியும், படங்களும்.

இந்த படங்கள் எளிதாக கற்பதற்க்கும், பயிற்சி பெற்று பயன்படுத்துவதற்க்கும்.

பணம் எவ்வளவு சம்பாதிக்கலாம்?

பணம் எவ்வளவு சம்பாதிக்கலாம்?

பொருள் இல்லார்க்கு இவ்வுலகமில்லை

என்பது வள்ளுவர் பெருமான் வாக்கு. பொருள் இல்லாமல் இன்று வாழ இயலாது. குடிக்கும் தண்ணீர் கூட பணம் கொடுத்து பெறும் நிலைக்கு தள்ளப்பட்டு விட்டோம். ஆனால், எவ்வளவு பணம் தேவை ? இங்கு தான் யாருக்கும் தெளிவு ஏற்படுவதில்லை. பணத்தை ஈட்ட முயற்சி செய்யும் போது, பணம் வர வர, நமக்கு குஷியாகவும் இன்பமாகவும் இருக்கும். அவ்வாறு பணத்தின் மீது ஆசை வைத்து அதன் பின்னால் செல்ல ஆரம்பித்து விட்டால், மெல்ல மெல்ல அது நம்முடைய எசமானனாகவும், நாம் அதற்கு அடிமையாகவும் மாறி விடுவோம்.

மனமானது ஆசைப் பட்டுக் கொண்டே இருக்கும். அதனின் ஆசையை அளவுகோலால் அளக்க இயலாது. பணம் வர வர ஆசையும் அதிகரித்துக் கொண்டே போகும். ஒரு கட்டத்தில், நாம் ஆசைப் படும் பணம் கிடைக்காது. அப்போது தான், நாம் வித்தியாசமாக நடந்து கொள்வோம். கோபம், இயலாமை, போன்ற உணர்வுகள் நம்மை ஆட்கொள்ளும். எப்படியாவது பணத்தை சம்பாதிக்க வேண்டும் என்ற எண்ணத்தில் அறம், நியாயம், மனிதாபிமானம் ஆகியவற்றை இழக்கத் தயாராகிவிடுவோம். காசுக்காக என்ன வேண்டுமானாலும் செய்வோம் என்ற நிலைக்கு அது நம்மைத் தள்ளி விடும். பலர் இந்த ஆரம்ப நிலையிலேயே அதை உணர்ந்து கொண்டு திருந்தி வாழ்வர். ஆனால், தொடர்ந்து பணத்தின் பின்னால் செல்பவர்கள், பல ஆண்டுகள் பாடுபட்டு கட்டிய தவம், புகழ், நற்பெயர் எனும் கோட்டைகள் அனைத்தும் ஒரே விநாடியில் நிலை குலைந்து, தகர்ந்து சுக்கு நூறாகிப் போகும். அதள பாதாளத்தில் விழுந்து விட்டதை உணர்வார்கள். நற்பெயரும் தவமும் ஒரு முறை இழந்து விட்டால், மீண்டும் இந்த பிறவியிலேயே அதை மீண்டும் சம்பாதிப்பது என்பது மிகவும் கடினம்.

ஆகவே, பணத்தின் பின்னால் சென்றால், அது நம்மைப் பாழுங்குழியில் தள்ளி விடும் என்பது கண்கூடாக காணும் உண்மை. மனிதனுக்கு 3 வேளை நல்ல உணவும், நல்ல தண்ணீரும், தூங்க நல்ல இடமும், உடுக்க நல் உடையும் இருந்தாலே போதும். அதற்கு மேல் அவனுக்குத் தேவையானது அனைத்தும் ஆடம்பரம் தான். ஆகவே, பணத்தை எது வரை பின்தொடர வேண்டும் என்பதை அறிந்து அது வரை மட்டுமே செல்ல வேண்டும். அதுவே உங்கள் வாழ்வை இனிதாக வைக்கும். அதிக பணம், நம் சிந்தனைகளை சிதறச் செய்வது மட்டுமின்றி, நம் செயல்பாடுகளையும் நம் வாழ்வின் நேரத்தையும் வீண் அலைச்சல்களில் அலைக்கழிக்கும். இப்பிறவியில் இவ்வுலகிலிருந்து பாவ புண்ணியங்களை மட்டுமே நாம் எடுத்துச் செல்ல முடியும். வேறு எதையும் எடுத்துச் செல்ல முடியாது.

தேவைக்கு அதிமாக இருக்கும் பணத்தை வைத்து புண்ணிய காரியங்கள் செய்யுங்கள். அன்னதானம், சிவாலய பணிக்கு உதவுதல், கோவில்களில் விளக்கிடுதல், பூசைக்கு வழியில்லாத கோவில்களுக்கு உதவுதல், கோ சாலைக்கு உதவுதல் போன்ற நற்பணிகள் செய்யுங்கள்.

சுந்தரரின் தமிழை விரும்பிய சிவபெருமான்

சுந்தரரின் தமிழை விரும்பிய சிவபெருமான்

நமசிவாய_வாழ்க. சுந்தரரின் தமிழை சிவன் எப்படி விரும்பினார் என்று பாருங்கள். சேரமான் பெருமான்நாயனார் திருக்கயிலாய ஞானவுலா பாடிய வரலாறு!

கொடுங்காளூரில் சேரர் குடியில் பெருமான் கோதையார் என்பவர் இளம் வயதிலேயே சிவபக்தி மிகுந்து அரச வாழ்வைத் துறந்து திருவஞ்சைக்களத்தில் ஆலயத் தொண்டு புரிந்து வாழ்ந்து வந்தார்.அப்போது செங்கோற் பொறையன் என்றும் சேர மகாராஜாவுக்குத் திடீரென்று ஞானோதயம் ஏற்பட, அவன் மகுடத்தைத் துறந்து காட்டிற்குச் சென்று தவம் செய்யலானான். நாடு அரசன் இல்லாமல் இருக்க முடியுமா? அதனால் நாட்டின் அமைச்சர்கள் யாவரும் திருவஞ்சைக்களத்திற்குச் சென்று அங்கு சிவத்தொண்டில் ஈடுபட்டிருந்த பெருமான் கோதையாரை அரசுப் பொறுப்பை ஏற்கும்படி மன்றாடிக் கேட்டுக் கொண்டனர். அவர் “சிவபெருமான் உத்தரவு தந்தால் அரியணை ஏறத்தயார்’ என்று கூறிச் சிவபெருமானைத் துதித்தார். சிவபெருமானும் சிற்சில சகுனங்கள் மூலம் அவர் இசையை தெரிவிக்க ஒரு சுபயோக தினத்தில் முடி சூட்டிக் கொண்டார். தினந்தோறும் நெடுநேரம் சிவபூஜை செய்வதைத் தவிர்ப்பதில்லை.

ஒருநாள் யானை மீது அமர்ந்து சகல விருதுகளுடன் நகரைப் பவனி வரும்போது ஒரு சலவைத் தொழிலாளி உவர் மண்ணைச் சுமந்து வந்தான். அப்போது சிறிது மழை பெய்யவே உவர் மண் கரைந்து அவன் உடலில் ஒழுகிக் காய்ந்து உடலெங்கும் விபூதி பூசியதுபோல் தோன்றியது. அவ்வளவுதான்… இதனைக்கண்ட யானைமீது அமர்ந்திருந்த மன்னன் கிடுகிடுவென்று கீழே இறங்கிப்போய் அந்த நபரை வணங்கினார்! அந்த சலவைத் தொழிலாளியோ அரசர் தன்னை வணங்குவது கண்டு நடுநடுங்கி விட்டான்! அரசரை பலமுறை தொழுது கைகூப்பி, “”மன்னர் பெருமானே! என்ன இது… என்னை நீங்கள் வணங்கலாமா” என்றான். அது கேட்ட மன்னன் (சேரமான் பெருமாள் நாயனார்) நிவீர் திருநீற்று வடிவத்தை எனக்கு நினைவு படுத்தினீர். அடியேன் அடிச்சேரன். நிவீர் வருந்த வேண்டாம். போம்” என்று மறுமொழி கூறி அவனை அனுப்ப அமைச்சர் முதலானோர் மன்னர், சிவனடியார்கள் பால் காட்டும் பரிவையும் மரியாதையையும் எண்ணி எண்ணி மகிழ்ந்தனர்.

நாள்தோறும் தவறாமல் மன்னன் செய்யும் சிவபூசையின் முடிவில் #நடராஜப்_பெருமானின் #சிலம்பொலி கேட்கும்! அதனைக் கேட்டால்தான் மன்னனுக்கும் நிம்மதி. தான் நியமம் தவறாமல் பூஜை செய்திருக்கிறோம் என்று மனம் பூரிப்பான்.

இப்படி இருக்கையில் ஒருநாள் பூஜை முடிவில் சிவனது சிலம்பொலி #கேட்கவில்லை! உடனே சேரமான் பெருமாள் நாயனாருக்குப் பெரும் வருத்தம்! இனி இவ்வுடல் இருந்து என்ன பயன்? என்று வாளை எடுத்துத் தன்னை #மாய்த்துக் கொள்ளத் துணிந்தார்.

மறு நொடி சிவபெருமான் சிலம்பை ஒலிக்கச் செய்து, “”அன்பனே! அவசரப்பட்டுப் பிராணத் தியாகம் செய்து விடாதே. #சுந்தர மூர்த்தியின் #பாடலில் சற்று ஆடி அமிழ்ந்து விட்டோம். அதனால் வரத் தாமதமாகிவிட்டது!” என்று கூறி சுந்தரமூர்த்தி சுவாமிகளின் பெருமையை வெளிப்படுத்தினார்.

சேரமான் பெருமாள் நாயனாருக்குப் பெரும் வியப்பு. சிவபெருமானின் உள்ளத்தைக் கொள்ளைக் கொண்ட அந்த சுந்தரமூர்த்தி சுவாமிகளை நேரில் சென்று தரிசித்திட வேண்டும் என்று நினைத்து உடனே #திருவாரூருக்குச் சென்று சுவாமிகளை வணங்கி நின்றான்.

சுந்தர மூர்த்தி சுவாமிகள் மீது மிகவும் நட்பு பாராட்டிய சேரமான் பெருமான் நாயனார் அவரைத் தம்மோடு கொடுங்காளூருக்கு அழைத்துச் சென்று உபசரித்து மகிழ்ந்தார். பின்னர் சுந்தரர் ஆரூர் சென்றார். இருவரும் மாற்றி மாற்றி இவர் அங்கு சென்று தங்குவதும் அவர் இங்கு வந்து தங்குவதுமாய் இருவரின் நட்பும் மிகப் பலப்பட்டு விட்டது.

ஒருநாள் சுந்தரமூர்த்தி சுவாமிகள் திருவஞ்சைக்களம் சென்று சிவபெருமானைத் தரிசித்து வழிபாடு செய்து கொண்டிருந்தார். சிவபெருமான் ஒரு வெள்ளையானையை அனுப்பிச் சுந்தரரை அதில் ஏறிவரும்படி பணித்தார். சுந்தரரும் சிவனால் அனுப்பப்பட்ட அந்த வெள்ளை யானை மீது ஏறி அமர்ந்து திருக்கயிலாயம் நோக்கிச் செல்கையில், தன் தோழரான சேரமான் பெருமாள் நாயனாரை நினைத்து “”அடடா! அவரும் நம்மோடு இருந்தால் மிகச் சிறப்பாக இருக்குமே” என்று எண்ணினார்.

அப்போது கொடுங்காளூரில் அரண்மனையில் நீராடிக் கொண்டிருந்தார் சேரமான் பெருமாள். அந்த நிலையிலேயே தன்னைப்பற்றி சுந்தரர் நினைப்பது பளிச்சென்று அவருக்குப் புலப்பட்டது! உடனே, அப்படியே அருகிலிருந்த குதிரை மீது தாவி ஏறி திருவஞ்சைக்களம் சென்றார். இவர் சென்று அடைவதற்குள் சுந்தரர் ஐராவதத்தின்மீது ஏறி விண்ணில் சென்று கொண்டிருந்தார்.

அதைக் கண்ட சேரமான் தன் குதிரையின் காதில் ஐந்தெழுத்தை (#நமசிவாய) ஓதினார். உடனே அக்குதிரை விருட்டென்று துள்ளித்தாவி விண்ணில் பாய்ந்து விரைவாகப் பறந்து சுந்தரமூர்த்தி நயனாரின் யானையை அடைந்து அதனை வலம் வந்து அதற்கு முன்னால் சென்றது! அதில் அமர்ந்தபடியே சேரமான் சுந்தரரை வணங்கிய படியே இருந்தார்.

இருவரும் கயிலாயத்தை அடைந்து கீழே இறங்கி பல வாயில்களைக் கடந்து பெருமாள் வீற்றிருக்கும் இடத்தை அடைந்தனர். அதன் வாயிலில் சேரமான் பெருமாள் நாயினார் தடுத்து நிறுத்தப்பட்டார். சுந்தரர் மட்டும் உள்ளே சென்று சிவபெருமான் முன் விழுந்து வணங்கித் துதித்துச் சேரர் கோன் வாயிலில் நிற்பதைக் கூறுகிறார்.

சிவபெருமான் புன்னகையுடன் சேரமானை உள்ளே அழைக்கிறார். “”இங்கே உம்மை நாம் அழையாதிருக்க எப்படி வந்தீர்?” என்று வினவ சேரமான் சிவனைப் பன்முறை விழுந்து வணங்கி, “”எனையாளும் எம் பெருமானே!

சுந்தர மூர்த்தி நாயனாருடைய திருவடிகளைத் துதித்து அவர் ஏறிச் சென்ற வெள்ளையானைக்கு முன் அவரைச் சேவித்துக் கொண்டே இங்கே வந்து விட்டேன். தேவரீரின் #ஐந்தெழுத்து மந்திரமே யான் ஏறிய புரவிக்கு அந்த மாயசக்தியைத் தந்து இங்கே என்னைக் கொண்டு வந்து சேர்ந்தது. தேவரீர் பொழியும் கருணை வெள்ளம் அடியேனை இங்கே கொண்டு வந்து ஒதுக்கியதால் இப்பேறு பெற்றேன். மலைமகள் நாயகனே! ஒரு விண்ணப்பம். அடியேன் தேவரீரது திருவருள் துணை கொண்டு திருவுலா ஒன்று பாடியுள்ளேன். அதனைக் கேட்டருள வேண்டும்!” என்று மனமுருகப் பிரார்த்தித்தார்.

அப்பொழுது சிவபெருமான் இளம் புன்னகையுடன் “”அப்படியா… சரி… அதனைச் சொல்!” என்று திருவாய் மலர்ந்தருள, சேரமான் பெருமாள் நாயனார், உடனே திருக்கயிலாய ஞானவுலாவை ஆசுகவியாகப் பாடிப் பெருமானைக் கேட்கும்படி செய்தார்.

அதனைச் செவிமடுத்த சிவன் அகமகிழ்ந்து அருள் செய்து, “”நம்முடைய கணங்களுக்கு நாதனாய் இரு!” என்று பணித்தார். சேரமான் பெருமாள் நாயனாரும் சிவகண நாதராகிச் சிவமூர்த்திக்குத் தொண்டரானார்.

#சிவாயநம

நாயன்மார்கள் குருபூசை எப்போது ?

நாயன்மார்களின் குருபூசை நட்சத்திரம்

திருச்சிற்றம்பலம்.தாமாக அறியும் திறன் இன்றி, அறிவிக்க அறியும் திறனை உடைய நமக்கு, ஒவ்வொன்றையும் குருவாக ஒருவர் அறிவிக்க, அதைக் கற்று அறிகிறோம். அவ்வகையிலே, இறைவனை அறியவும் அவனின் திருவருளைப் பெறவும் நமக்கு வழி காட்டுபவர்களாய் இருப்பவர்கள் நம் குருமார்கள். சீடனுடைய அறியாமையை நீக்கி, இறைவனிடம் இட்டுச் செல்ல வல்லவரே குருவாவர். துன்பமின்றி வாழவும் இறைவன் திருவருள் பெற்று பேரின்பவீடு பெறவும் நமக்கு வழிகாட்டியார் இருப்போர் 63 நாயன்மார்கள். அத்தகையோரை நாம் கொண்டாட வேண்டாமா ? பூசை செய்ய வேண்டாமா ?எந்நன்றி கொன்றார்க்கும் உய்வுண்டாம் உய்வில்லை
செய்ந்நன்றி கொன்ற மகற்கு. என்பது தெய்வப் புலவர் வாக்கு. நமக்கு இறைவனையும் அவனை அடையும் வழியையும் காட்டும் குருவிற்கு நாம் நன்றி சொல்ல மிகவும் கடமைப் பட்டிருக்கிறோம்.  இறைவன் திருக்காட்சி கொடுத்து நாயன்மார்கள் முக்தி அடைந்த தினத்தை நாம் நாயன்மார் குருபூசையாக வணங்குகிறோம். நாயன்மார்களின் குருபூசை செய்வது நம் தொன்று தொட்டு செய்து வரும் மரபாகும். இல்லங்களிலும் திருக்கோவில்களிலும் நாயன்மார்களின் குருபூசை நிகழ்ந்து வருகிறது. குருவருளைப் பெற்றால், திருவருளை எளிதில் பெறலாம் என்பது பெரியோர் வாக்கு.

குரு பூசை

63 நாயன்மார்கள் முக்தியடைந்த நட்சத்திர நாளை நாம் அவர்களது குருபூசையாக வணங்கி வருகிறோம். எத்தனையோ உலகங்கள் காலத்தை துல்லியமாக கணக்கிட முடியாமல் தவித்த காலத்தில் நம் முன்னோர்கள் காலத்தையும் இடத்தையும் மிக மிகத் துல்லியமாக அளக்கும் அளவைகளையும் வைத்து மிகவும் முன்னோடியான நாகரீகமாகத் திகழ்ந்தார்கள். ஆகையாலேயே, நாம் இன்றும் நம் நாயன்மார்களின் துல்லியமான முக்திநாளை கொண்டாடி குருபூசை செய்ய வேண்டும்.

சிவாயநம.

சென்னையில் ஒரு கிரிவலம். வாருங்கள் நிறைமதி அன்று சென்னையில் கிரிவலம் செல்வோம்

சென்னையில் ஒரு கிரிவலம். வாருங்கள் நிறைமதி அன்று சென்னையில் கிரிவலம் செல்வோம்

குன்று இருக்கும் இடமெல்லாம் குமரன் இருப்பான் என்பது தமிழ் வழக்கு. ஆற்றல் உள்ள மலைகளை சிவமாகவே வணங்கி வலம் வருவதும் நம் மரபு. அவ்வாறாக இந்தியாவில் பல்வேறு மலைகளை சிவமாக வலம் வந்து வணங்கிக் கொண்டிருக்கின்றனர். அவ்வாறான ஒரு மலை சென்னை மாநகரிலும் உள்ளது.

சென்னை மாநகரின் மேடவாக்கத்தை அடுத்த பெரும்பாக்கம், அரசன்கழனி, சித்தாலபாக்கம், நூக்கம்பாளையம் ஆகிய ஊர்களையும், போலினேனி ஹில்சைட் (Bollineni Hillside) போன்ற நவீன குடியமைப்பு நகரங்களின் நடுவில் அமைந்துள்ளது ஔடத சித்தர் மலை. இந்த மலையின் மீது பன்நெடுங்காலமாக சிவபெருமான் இலிங்க வடிவாய் எழுந்தருளி அருள் புரிந்து வருகிறார். நிறைய பக்தர்கள் இம்மலை மீது கூறை இல்லாமல் இருக்கும் சிவபெருமானைத் தரிசித்து அபிஷேக வழிபாடு செய்து வருகிறார்கள். இம்மலை மீது கார்த்திகை தீபத் திருநாள் அன்று, திருக்கார்த்திகை தீபமும் ஏற்றப்படுகிறது. இந்த மலையைச் சுற்றி ஒவ்வொரு மாதமும் நிறைமதி/பௌர்ணமி அன்று மலைவலம் (கிரிவலம்) நடைபெற்று வருகிறது. சுமார் 4 கிலோமீட்டர் தூரம் சுற்றளவு உள்ள இந்த மலையை ஒரு முறை வலம் செய்ய 1 மணி நேரம் 15 நிமிடங்களும் ஆகிறது. மலை மீது ஏற சுமார் 20-30 நிமிடமும், இறங்க சுமார் 15-20 நிமிடங்களும் ஆகிறது.

ஒவ்வொரு நிறைமதி நாளன்றும் மாலை 5 மணிக்கு அரசன்கழனி அருள்மிகு கல்யாணபசுபதீஸ்வரர் திருக்கோவிலில் இருந்து இந்த மலைவலம் துவங்குகிறது. சுமார் 3000 பேர் கலந்து கொள்ளும் இந்த கிரிவலத்தில் ஊர் மக்களும் சென்னையைச் சுற்றியுள்ள மக்களும் மிகவும் ஆர்வத்துடன் கலந்து கொண்டு கிரிவலம் வருகின்றனர். கிரிவலம் வருவதற்க்கு முன்பு, பலர் தங்கள் இல்லங்களில் வாசலில் அழகிய கோலம் இடுகின்றனர். சிவ வாத்தியம் முன் செல்ல, தமிழர்களின் வேதமாம் பன்னிரு திருமுறை ஏந்தி பக்தர்கள் மலைவலம் வருகின்றனர்.

தை மாத நிறைமதி நன்னாளில் மலைவலத்தோடு மட்டும் அல்லாமல், கோவிலின் அருகில் இருந்த குளத்தில் தெப்பல் திருவிழா இந்த ஆண்டு முதன் முறையாக நடைபெற்றது. இதை பல்லாயிரக்கணக்கானோர் கலந்து கொண்டு தெப்பல் திருவிழாவைக் கண்டு களித்தனர்.

கோவிலை அடையும் வழி

மேடவாக்கத்திலிருந்து ஷேர் ஆட்டோ வசதி உள்ளது. 51B பேரூந்து சைதாப்பேட்டை, மேடவாக்கத்திலிருந்து அரசன்கழனி நிறுத்தத்தில் நிற்கும். இறங்க வேண்டிய இடம் அரசன்கழனி பஸ்டாப். தாம்பரத்திலிருந்து 51K பேரூந்து இந்த நிறுத்தத்தில் நிற்கும்.

ஒவ்வொரு நிறைமதி தினம் அன்றும் வாருங்கள்.

அரசன்கழனி பசுபதீசுவரர் ஆலயம் அமைந்துள்ள இடம் – இதை சுட்டவும்

மேலும் தகவல்களுக்கு: +91-8122299938, +91-9382664059 அழைக்கவும்.

கூகுள் வரை படத்தில் ஔடத சித்தர் மலை அமைவிடம்

கூகுள் வரை படத்தில் ஔடதசித்தர் மலை அமைவிடம்
கிரிவலப் பாதையில் கோலம்
அரசன்கழனி அருள்மிகு கல்யாண பசுபதீஸ்வரர் ஆலயம்
கிரிவலத்தின் போது..
கோவில் அருகே உள்ள அழகிய திருக்குளம்

மகாசிவராத்திரி ஏன் மிகவும் சிறப்பானது ?

மகாசிவராத்திரி வழிபாடு ஏன் மிகவும் சிறப்பானது?

சைவ சமயத்தவரின் மிகுந்து போற்றும் திருநாள் மகாசிவராத்தியாகும். அந்த மகாசிவராத்திரி எப்போது வருகிறது, அதன் சிறப்பு யாது என்பதைக் காண்போம்.

மகா சிவராத்திரி எப்போது வருகிறது ?

ஒவ்வொரு தமிழ் மாதத்தின் தேய்பிறை சதுர்த்தசி (அதாவது பௌர்ணமியிலிருந்து 14 ஆவது நாள்) அன்று இரவு சிவராத்திரி ஆகும். அதாவது இதை மாத சிவராத்திரி என்பர். மகா சிவராத்திரி என்பது மாசி மாதத்தில் வரும் தேய்பிறை சதுர்த்தசி இரவாகும்.

மகா சிவராத்திரியின் சிறப்பு யாது ?

ஊழிக் காலம் என்பது பல்வேறு உலகங்களும் சிவபெருமானிடத்தே ஒடுங்கும் காலமாகும். பேரூழிக்காலம் என்பது, சிவபிரானைத் தவிர, மற்ற அனைத்துமே எம்பெருமானிடம் ஒடுங்கும் நிலையாகும். அவ்வாறு ஒரு முறை ஒடுங்கியிருந்த போது, மீண்டும் இப்பிரபஞ்சத்தைத் தோற்றுவித்து உயிர்களைக் காத்து அருளுமாறு கருணை கொண்டு, சிவபிரானின் சக்தி வடிவான தேவியானவள் சிவபிரானை நோக்கி இடைவிடாது தவம் செய்தாள். அதனை ஏற்ற சிவபிரான், மீண்டும் உலகங்களை உண்டாகச் செய்து உயிர்களைக் காத்து அருளினார். இதற்கு நன்றி தெரிவிக்கும் வகையில் உமையவள் எம்பெருமானை ஓர் முழு இரவும் மனதில் தியானித்துப் போற்றிய நாளே மகாசிவராத்திரியாகும்.

மகாசிவராத்திரி அன்று பல்வேறு காலங்களில் பல்வேறு நிகழ்வுகள் நடந்துள்ளதாக பதிவிடப்பட்டிருக்கிறது. மற்றொரு யுகத்தில் அடிமுடி தேடிய வரலாறு நிகழ்ந்த போது, இறைவன் ஒளிப்பிளம்பாய் அண்ணாமலையாராய் தோன்றி அருளியது மகாசிவராத்திரி அன்று தான். பிரம்மனும் திருமாலும் அறியாமையினால், தாமே பெரியவர் என்று கர்வங் கொண்டு தமக்குள் வாதிட்டுக் கொண்டனர். அவர்களின் அறியாமையைப் போக்க எண்ணிய சிவபெருமானார் அவர்கள் முன்பு நெடும் ஒளிப்பிளம்பாகத் தோன்றி, அவர்களில் யார் ஒருவர் தனது கால் அடியையோ அல்லது தலை முடியையோ காண்பவரே வென்றவர் என்று சொல்ல, திருமால் பன்றி உருக்கொண்டு பூமியைத் துளைத்து இறைவனின் திருவடியைத் தேடிச் செல்லலானார். பிரம்மனோ, அன்னப்பறவை உருக்கொண்டு, இறைவனின் திருமுடியைக் காண மேலே பறந்து சென்றார். பல யுகங்கள் கடந்தும் இருவராலும் அடியையோ முடியையோ காண முடியாத நிலை தோன்றவே, சிவபெருமானின் தலையிலிருந்து வந்த தாழம்பூ மலரிடம் தான் இறைவனின் முடியைப் பார்த்ததாக பொய்ச்சாட்சி சொல்லக் கேட்க, அம்மலரும் பொய் சாட்சி சொல்லி, பிரம்மனுக்கும் தாழம்பூ மலருக்கும் இப்பூவுலகில் கோவில் மற்றும் வழிபாடு கிடையாது என்று சாபம் பெற்றனர். இவ்வாறு திருவண்ணாமலையில் அனைவரும் காண, ஒளிப்பிளம்பாய் நின்ற சிவபெருமான் தோன்றியது மகாசிவராத்திரி அன்றாகும்.

மற்றொரு காலத்தில், ஒரு காலத்தில் ஒரு குரங்கானது வில்வ மரத்தின் மீது அமர்ந்து இரவு முழுவதும் வில்வ இலைகளைப் பறித்துக் கீழே எறிந்தது. அம்மரத்தின் அடியின் கீழே சிவலிங்கம் ஒன்று இருந்தது. வில்வ இலைகள் எல்லாம் இலிங்கத்தின் மீது அர்ச்சனையாக விழுந்தது. எதேச்சையாக நிகழ்ந்தாலும், அகமகிழ்ந்த சிவபிரான் அந்த குரங்கிற்கு காட்சி கொடுத்து அடுத்த பிறவியில் சக்கரவர்த்தியாக பிறக்குமாறு அருளிச் செய்தார். இவை அத்தனையும் எதிர்பார்த்திராத அந்த குரங்கானது, இறைவனிடம், தான் சக்கரவர்த்தியாக பிறக்கும் போது, தனது முகத்தை குரங்காகவே இருக்குமாறு அருளிச் செய்யுமாறு கேட்டது. இதைக் கேட்டு, தன் பழைய பிறப்புக்களையும் நிலையையும் மறவாதிருக்க குரங்கு அவ்வாறு கேட்டதையுணர்ந்த சிவபிரான் சிரித்துக் கொண்டு அவ்வாறே அருளிச் செய்தார். அந்தக் குரங்கே அடுத்த பிறவியில் முசுகுந்தச் சக்கரவர்த்தியாகப் பிறந்து சிறப்புற்றது.